ຂໍ້ມູນຈາກໜັງສືພິມວຽງຈັນໃໝ່

ງານບຸນນະມັດສະການພະທາດຫຼວງເປັນບຸນປາງໃຫຍ່ຂອງປວງຊົນລາວທັງຊາດທີ່ໄດ້ປະຕິບັດສືບທອດກັນມາແຕ່ບູຮານນະການ ງານບຸນດັ່ງກ່າວເປັນສັນຍາລັກແຫ່ງຄວາມສາມັກຄີຂອງປວງຊົນລາວທັງຊາດທີ່ໄດ້ມາເຕົ້າໂຮມກັນໃຫ້ການອະນຸຮັກປົກປັກຮັກສາຮີດຄອງປະເພນີ ແລະ ວັດທະນະທຳອັນດີງາມຂອງຊາດໃຫ້ຄົງຢູ່ກັບຊາດລາວ ແລະ ຄົນລາວຕະຫຼອດໄປເຊິ່ງງານບຸນນະມັດສະການພະ ທາດຫຼວງວຽງຈັນປະຈຳປີ 2024 ແມ່ນໄດ້ຈັດຂຶ້ນຢ່າງຍິ່ງໃຫຍ່ສະແດງໃຫ້ເຫັນເຖິງເອກະລັກຮີດຄອງປະເພນີອັນດີງາມຂອງລາວເຮົາໄດ້ຢ່າງໜ້າພາກພູມໃຈເພື່ອເອກອ້າງໃຫ້ແຂກຕ່າງປະເທດທີ່ເດີນທາງເຂົ້າມາຮ່ວມງານ ກໍຄື ນັກທ່ອງທ່ຽວຊາວຕ່າງປະເທດໄດ້ເຫັນເຖິງຄວາມງົດງາມຂອງວັດທະນະທຳລາວ ທີ່ຄົນລາວເຮົາຮ່ວມກັນຮັກສາຮີດຄອງປະເພນີອັນດີງາມນີ້ໄວ້ໃຫ້ຍັງຄົງຢູ່ຄູ່ກັບລາວເຮົາຕະຫຼອດໄປ.

ແມ່ ສະໝອນ ສຸກສຳລານ ປະຊາຊົນບ້ານຫົວເມືອງ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ໃຫ້ສຳພາດ ໃນໂອກາດມາທ່ຽວງານບຸນນະມັດສະການພະທາດຫຼວງວຽງ ຈັນປະຈຳປີ 2024 ນີ້ວ່າ: ນັບແຕ່ຮຽນໜັງສືແລ້ວ ແມ່ກໍໄດ້ໄປຢູ່ຕ່າງປະເທດ ແຕ່ກໍກັບມາຢາມເມືອງລາວທຸກໆປີ ເພາະມັກ ຮັກເມືອງລາວ ດິນແດນລາວທີ່ເປັນແຜ່ນດິນເກີດຂອງຕົນເອງ ປັດຈຸບັນແມ່ແມ່ນອາໃສຢູ່ແຄຣິຟໍເນຍ ສະຫະລັດອາເມຣິກາ ໂດຍໄດ້ໄປໃຊ້ຊີວິດຢູ່ຕ່າງປະເທດໄດ້ 48 ປີແລ້ວ ແຕ່ກໍບໍ່ເຄີຍລື່ມປະເທດລາວ ວັດທະນະທຳອັນດີງາມຂອງລາວ ເຊິ່ງໄດ້ມີຄວາມຕັ້ງໃຈເດີນທາງກັບມາຢ້ຽມຢາມປະເທດລາວໃນໄລຍະບຸນນະມັດສະການພະ ທາດຫຼວງເພື່ອໃຫ້ໄດ້ມາທ່ຽວງານບຸນພະທາດຫຼວງວຽງ ຈັນເຊິ່ງງານບຸນນີ້ແມ່ນໄດ້ປະຕິບັດສືບທອດກັນມາແຕ່ດົນນານ ເມື່ອເກີດໄດ້ໃຫຍ່ມາກໍໄດ້ມີໂອກາດມາທ່ຽວງານບຸນແຕ່ການຈັດງານບຸນໃນເມື່ອກ່ອນແມ່ນຍັງບໍ່ຈັດໃຫຍ່ເທົ່າກັບປັດຈຸບັນ ສະແດງໃຫ້ເຫັນວ່າ ຮີດຄອງປະເພນີວັດທະນະທຳຂອງລາວເຮົາແມ່ນລູກຫຼານລາວເຮົາໄດ້ພ້ອມ ກັນຮັກສາ ແລະ ສືບຕໍ່ປະຕິບັດມາຈົນເຖິງທຸກມືນີ້ ໃນການ ກັບມາຢ້ຽມຢາມບ້ານເກີດເມືອງນອນເທື່ອນີ້ເຫັນວ່າປະ ເທດລາວມີຄວາມຈະເລີນກ້າວໜ້າຫຼາຍ ງາມກ່ອນເກົ່າ ໄປບ່ອນໃດກໍຈະເລີນຫູຈະເລີນຕາ ທຸກບ່ອນແມ່ນໄດ້ຮັບການພັດທະນາໃນທຸກໆດ້ານ ເວົ້າສະເພາະການຈັດງານບຸນນະ ມັດສະການພະທາດຫຼວງວຽງຈັນ ຖືເປັນງານບຸນປະເພນີລາວເຮົາທີ່ເຄີຍປະຕິບັດສືບທອດກັນມາ ປະຊາຊົນລາວທັງຊາດຕ່າງກໍຮັກ ແລະ ຫວງແຫນໃນວັດທະນະທຳອັນງົດງາມນີ້ໄວ້ໃຫ້ລູກຫຼານ ແລະ ໄດ້ມີການຈັດງານສະເຫຼີມສະຫຼອງບຸນພະທາດຫຼວງຂຶ້ນທຸກໆປີ ພິເສດການຈັດງານບຸນປີນີ້ເຫັນວ່າຍິ່ງໃຫຍ່ ເປັນລະບຽບຮຽບຮ້ອຍ ແລະ ຈົບງາມຫຼາຍໆ ມີບັນຍາກາດຄຶກຄື້ນມ່ວນຊື່ນ ມີປະຊາຊົນເຂົ້າມາທ່ຽວງານຫຼາຍກວ່າທຸກໆປີທີ່ຜ່ານມາ ຈຸດເດັ່ນແມ່ນການຮັກສາຮີດຄອງປະເພນີ ສະແດງໃຫ້ເຫັນເຖິງຄວາມສາມັກຄີ ຮັກເຊື້ອແພງຊາດຂອງປະຊາຊົນລາວຢ່າງແທ້ຈິງ ພາຍໃນງານບຸນເຫັນວ່າມີຫຼາຍກິດຈະກໍາທີ່ໜ້າສົນໃຈເພື່ອຊຸກຍູ້ສົ່ງເສີມປີທ່ອງທ່ຽວລາວ 2024 ໃຫ້ຮັກສາໄດ້ວັດທະ ນະທຳອັນດີງາມ ເປັນຕົ້ນການປະດັບປະດາຮ້ານຄ້າໄດ້ຕົບແຕ່ງເປັນເອກະລັກຂອງລາວ ໂດຍສະເພາະປະຕູໂຂງທາງເຂົ້າງານໄດ້ຕົບແຕ່ງປະດັບປະດາດ້ວຍແຄນຄຽງຄູ່ກັບກອງຫາງ ພ້ອມປະດັບປະດາດ້ວຍກະຕິບເຂົ້າໃຫຍ່ທີ່ເປັນເອກະລັກວັດທະນະທຳລາວຢ່າງສວຍງາມ ແລະ ອື່ນໆ ການຈັດສັນຮ້ານຂາຍເຄື່ອງມີຄວາມເປັນລະບຽບຮຽບ ຮ້ອຍດີກ່ອນຄັ້ງຜ່ານມາ ການໄປມາກໍມີຄວາມສະດວກດີ.

ໃນໂອກາດນີ້ ແມ່ສະໝອນ ສຸກສຳລານ ໄດ້ຂໍເຊີນຊວນຄົນທີ່ເຄີຍຢູ່ເມືອງລາວ ໃຫ້ມາຢ້ຽມຢາມເມືອງລາວ ເພາະເມືອງລາວມີຄວາມຈະເລີນກ້າວໜ້າຫຼາຍ ທຸກຢ່າງມີການພັດທະນາດີຂຶ້ນ ພວກເຮົາຄົນລາວຕ້ອງມາສະໜັບສະໜູນເມືອງລາວໃຫ້ມີຄວາມຈະເລີນຮຸ່ງເຮືອງຂຶ້ນໄປເລື້ອຍໆ.