ຂໍ້ມູນຈາກໜັງສືພິມວຽງຈັນໃໝ່

ທຸກງານບຸນຂອງລາວ ລວມທັງງານບຸນນະມັດສະການພະທາດຫຼວງວຽງຈັນ ເຊິ່ງເປັນບຸນປາງໃຫຍ່ຂອງປະຊາຊົນລາວບັນດາເຜົ່າ ກໍຄືຊາວ ນະຄອນຫຼວງວຽງຈັນ ແມ່ນໜຶ່ງໃນຮີດ 12 ຄອງ 14 ຂອງລາວ ທີ່ເຄີຍປະຕິບັດສືບທອດກັນມາແດ່ດົນນານ ປີນີ້ຈັດຂຶ້ນຢ່າງຍິ່ງໃຫຍ່ເປັນເວລາ 5 ວັນ ນັບແຕ່ວັນທີ 11-15 ພະຈິກ 2024 ໜຶ່ງໃນເອກະລັກຂອງງານບຸນທີ່ຂາດບໍ່ໄດ້ແມ່ນ ຜະລິດຕະພັນເຂົ້າຫຼາມ-ປີ້ງໄກ່ໄດ້ກາຍເປັນວັດທະນະທຳອັນດີງາມຂອງຊາດລາວ ແລະ ໄດ້ຮັບຄວາມນິຍົມຊົມຊອບຂອງປະຊາຊົນລາວເປັນຢ່າງດີ.

ທ່ານ ນາງ ຄຳຕາ ພົມມະຫາ ປະຊາຊົນບ້ານບໍ່ ເມືອງທຸລະຄົມ ແຂວງວຽງຈັນ ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນ ເມື່ອບໍ່ດົນມານີ້ວ່າ: ຕົນເອງ ແລະ ຄອບຄົວໄດ້ມາຂາຍເຂົ້າຫຼາມ-ປີ້ງໄກ່ໃນງານບຸນນະມັດສະການພະທາດຫຼວງວຽງຈັນທຸກໆປີ ເຂົ້າຫຼາມ-ປີ້ງໄກ່ ຖືເປັນເອກະລັກໃນງານບຸນທີ່ຂາດບໍ່ໄດ້ ປະຊາຊົນສ່ວນໃຫຍ່ນິຍົມຮັບປະທານ ແລະ ຊື້ກັບບ້ານເພື່ອເປັນຂອງຕ້ອນຂອງຝາກໃນຍາມບຸນ ລາຄາປີ້ງໄກ່ເລີ່ມຕົ້ນ 50.000 ກີບຂຶ້ນໄປ ເຂົ້າຫຼາມເລີ່ມຕົ້ນ 20.000 ກີບຕໍ່ບັ້ງຂຶ້ນໄປ.

ແມ່ ແໜ ວົງໄຊ ປະຊາຊົນບ້ານໂພນສະຫວ່າງ ເມືອງທຸລະຄົມ ແຂວງວຽງຈັນ ໄດ້ນຳເອົາເຂົ້າຫຼາມ-ປີ້ງໄກ່ມາຂາຍໃນງານບຸນທຸກໆປີ ເປັນເວລາ 10 ກວ່າປີແລ້ວ ທີ່ຢຶດຖືອາຊີບຂາຍເຂົ້າຫຼາມປີ້ງ-ໄກ່ ເຊິ່ງປີນີ້ເຫັນວ່າໄດ້ຂາຍດີກວ່າປີຜ່ານມາ ເຂົ້າຫຼາມມີລາຄາ 10.000 ຫາ 50.000 ກີບ ປີ້ງໄກ່ລາຄາ 50.000 ກີບຂຶ້ນໄປ ປີນີ້ເຫັນວ່າໄດ້ຂາຍດີກວ່າທຸກໆປີ ເຮັດໃຫ້ງານບຸນມີບັນຍາກາດຄຶກຄື້ນມ່ວນຊື່ນ ເພື່ອສົ່ງເສີມວັດທະນະທຳອັນດີງາມຂອງຊາດໄວ້ໃຫ້ຄົງຢູ່ຕະຫຼອດໄປ.