ທ່ານ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ ພ້ອມດ້ວຍ ຮອງຫົວໜ້າຫ້ອງວ່າການສູນກາງພັກ, ຮອງຫົວໜ້າຫ້ອງວ່າການສຳນັກງານປະທານປະເທດ ພ້ອມດ້ວຍຄະນະ ໄດ້ຢ້ຽມຢາມ, ເລາະຊົມບຸນນະມັດສະການພະທາດຫລວງວຽງຈັນ ໃນວັນທີ 14 ພະຈິກ 2024 ໂດຍການຕ້ອນຮັບຂອງ ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫລວງວຽງຈັນ ພ້ອມຄະນະ.

ທ່ານ ນາງ ວຽງພອນ ແກ້ວຄູນສີ ຫົວໜ້າພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ນະຄອນຫລວງວຽງຈັນ ໄດ້ໃຫ້ຮູ້ວ່າ: ບຸນນະມັດສະການພະທາດຫລວງວຽງຈັນ ແລະ ງານວາງສະແດງສິນຄ້າ ປະຈຳປີ 2024 ໄດ້ມີຮ້ານວາງສະແດງສິນຄ້າຢູ່ເດີນສະໜາມຫລວງ 1.463 ຫ້ອງ, ຢູ່ສູນການຄ້າ ລາວ-ໄອເຕັກ 142 ຮ້ານ. ສິນຄ້າສ່ວນຫລາຍຈະເປັນຜະລິດຕະພັນພາຍໃນເຊັ່ນ: ຜະລິດຕະພັນສິນຄ້າກະສິກຳ, ຫັດຖະກຳ ແລະ ຜະລິດຕະພັນວັດທະນະທຳ, ຜະລິດຕະພັນອຸດສາຫະກຳໂຮງຈັກ, ໂຮງງານຂະໜາດໃຫຍ່, ກາງ ແລະ ຂະໜາດນ້ອຍ. ພ້ອມນີ້, ຍັງໄດ້ເຊີນບັນດານະຄອນເພື່ອນມິດຕ່າງປະເທດ ເຂົ້າມາຮ່ວມງານ ແລະ ສ້າງເງື່ອນໄຂໃຫ້ມີການນຳເອົາຜະລິດຕະພັນສິນຄ້າມາແລກປ່ຽນວາງສະແດງ ແລະ ຂາຍໃນງານ ຊຶ່ງມີ 2 ພາກສ່ວນເຂົ້າຮ່ວມຄື: ແຂວງຢຸນນານ ສປ ຈີນ ແລະ ແຂວງໜອງຄາຍ ປະເທດໄທ.

ໃນບຸນນະມັດສະການພະທາດຫລວງວຽງຈັນປີນີ້, ມີຫລາຍກິດຈະກຳ ທີ່ໜ້າທ່ຽວຊົມ ເປັນຕົ້ນ ເຮືອນຊົງລາວ, ຮ້ານວາງສະແດງສິນຄ້າ ເຄື່ອງອຸປະໂພກ, ບໍລິໂພກ, ມີອາຫານພື້ນບ້ານ ປະເພດເຂົ້າຫລາມ, ປີ້ງໄກ່, ອາຫານລາວ. ນອກຈາກນີ້, ຍັງມີການສະແດງສິລະປະວັນນະຄະດີ (ເວທີກາງ) ການສະແດງການຟ້ອນ, ຂັບລຳ ຈາກກອງສິລະປະກອນສູນກາງ, ສິລະປະກອນກອງທັບ, ສິລະປະຈາກບັນດາເມືອງ, ສູນວັດທະນະທຳເດັກ ແລະ ສະໂມສອນດ່ານຊ້າງ ເຂົ້າຮ່ວມການສະແດງໃນແຕ່ລະມື້. ທັງນີ້, ແນໃສ່ເພື່ອເປັນການສົ່ງເສີມວັດທະນະທຳ, ຮີດຄອງປະ ເພນີອັນດີງາມຂອງຊາດ ໃຫ້ຄົງຢູ່ຄູ່ກັບຄົນລາວ ແລະ ຊາດລາວຕະຫລອດໄປ, ທັງເປັນການຊຸກຍູ້ສົ່ງເສີມການທ່ອງທ່ຽວ ທາງດ້ານວັດທະນະທຳ ແລະ ປະຫວັດສາດຂອງຊາດ.ທ່ານ ພູວົງ ວົງຄຳຊາວ ໄດ້ກ່າວຕື່ມວ່າ: ບຸນນະມັດສະການພະທາດຫລວງ ເປັນປາງບຸນໃຫຍ່ສຳຄັນ, ເປັນສູນກາງເຕົ້າໂຮມຄວາມສາມັກຄີຂອງປວງຊົນລາວບັນດາເຜົ່າ ເຊີນຊວນປະຊາຊົນລາວບັນດາເຜົ່າ ແລະ ນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າຮ່ວມທ່ຽວຊົມງານ ແລະ ເຂົ້າຮ່ວມກິດຈະກຳຕ່າງໆ ດ້ວຍຄວາມເບີກບານມ່ວນຊື່ນ, ປະຕິບັດຕາມຮີດຄອງປະເພນີອັນດີງາມຂອງຊາດລາວເຮົາ ແລະ ປະຕິບັດຕາມກົດລະບຽບຂອງງານ ຢ່າງເຂັ້ມງວດ ເພື່ອເຮັດໃຫ້ບຸນໃນຄັ້ງນີ້, ດຳເນີນໄປດ້ວຍບັນຍາກາດອັນຄຶກຄື້ນ ຮັກສາໄດ້ຄວາມສະຫງົບ, ປອດໄພ.