ວັນທີ 14 ພະຈິກ 2024 ທີ່ສະຖານີວິທະຍຸກະຈາຍສຽງແຫ່ງຊາດລາວ ນະຄອນຫຼວງວຽງຈັນ ໄດ້ສຳເລັດການຈັດຊຸດຝຶກອົບຮົມໃຫ້ແກ່ສື່ມວນຊົນ ໃນຫົວຂໍ້: ການລາຍງານຂ່າວບັນຫາສີຂຽວ ໃຫ້ກຽດມອບ-ຮັບໃບຢັ້ງຍືນ ໂດຍ ທ່ານ ສະຫວັນຄອນ ລາຊະມຸນຕີ ປະທານສະມາຄົມນັກຂ່າວແຫ່ງ ສປປ ລາວ, ອະດີດຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ມີ ທ່ານນາງ ບົວຄໍາ ດວງປັນຍາ ຫົວໜ້າໂຄງການແກມຊິວ ອົງການແຄຣນາໆຊາດ ປະຈໍາ ສປປ ລາວ ພ້ອມດ້ວຍສໍາມະນາກອນຂະແໜງການກ່ຽວຂ້ອງ ເຂົ້າຮ່ວມ.

ຊຸດຝຶກອົບຮົມຄັ້ງນີ້, ແມ່ນໜຶ່ງໃນກິດຈະກຳຫຼັກຂອງໂຄງການສ້າງຄວາມເຂັ້ມແຂງໃຫ້ແກ່ສື່ມວນຊົນ ໂດຍການມີສ່ວນຮ່ວມຂອງອົງການຈັດຕັ້ງພາກສັງຄົມທີ່ກ່ຽວຂ້ອງ ເພື່ອການພັດທະນາສີຂຽວໃນ ສປປ ລາວ ຫຼື ເອີ້ນຊື່ຫຍໍ້ວ່າແກມຊິວ (GAMCIL) ເພື່ອບັນລຸຕາມແຜນຍຸດທະສາດຂອງສະມາຄົມນັກຂ່າວແຫ່ງ ສປປ ລາວ ແລະ ແຜນການດຳເນີນກິດຈະກຳຂອງໂຄງການ ໃນການສ້າງຄວາມອາດສາມາດໃຫ້ແກ່ຜູ້ທີ່ເຮັດວຽກງານຂະແໜງຖະແຫລງຂ່າວສື່ມວນຊົນໃນທົ່ວປະເທດ ແລະ ເຂົ້າຮ່ວມການເຄື່ອນໄຫວກິດຈະກຳການຝຶກອົບຮົມຕ່າງໆ ທີ່ຈະໄດ້ຈັດຂຶ້ນ ໂດຍສະມາຄົມນັກຂ່າວແຫ່ງ ສປປ ລາວ ຕະຫລອດໄລຍະການດຳເນີນໂຄງການ ຜູ້ເຂົ້າຮ່ວມໄດ້ຮຽນຮູ້ຫລາຍບັນຫາສໍາຄັນເຊັ່ນ: ວຽກງານການຄຸ້ມຄອງສື່ມວນຊົນ, ຄວາມປອດໄພໃນການໃຊ້ສື່ສັງຄົມອອນລາຍ ແລະ ການແກ້ໄຂບັນຫາສື່ສັງຄົມອອນລາຍ; ການພັດທະນາສີຂຽວ, ບັນຫາສິ່ງແວດລ້ອມ ແລະ ການນໍາໃຊ້ເອໄອເຂົ້າຊ່ວຍວຽກງານສື່; ບົດບາດ ແລະ ຄວາມສະເໝີພາບຍິງ-ຊາຍໃນຍຸກດີຈິຕອນ ແລະ ຈັນຍາບັນນັກຂ່າວໃນຍຸກປັດຈຸບັນ; ການຖ່າຍ-ຕັດຕໍ່ວິດີໂອ ແລະ ຮູບພາບຂ່າວໃສ່ສື່ອອນລາຍ ແລະ ອື່ນໆ. ພ້ອມນັ້ນ, ຍັງໄດ້ເຮັດກິດຈະກໍາເປັນກຸ່ມ ພ້ອມທັງຮຽນຮູ້ທິດສະດີ ແລະ ປະຕິບັດຕົວຈິງ.

ໂຄງການ GAMCIL ໄດ້ຮັບການສະໜັບສະໜູນທຶນຈາກສະຫະພາບເອີຣົບ ໃນໄລຍະ 4 ປີ ນັບແຕ່ປີ 2023-2027 ແລະ ມອບໝາຍໃຫ້ສະມາຄົມນັກຂ່າວແຫ່ງ ສປປ ລາວ ແລະ ອົງການແຄຣ ນາໆຊາດປະຈຳ ສປປ ລາວ ເປັນຜູ້ຈັດຕັ້ງປະຕິບັດກິດຈະກຳຂອງໂຄງການ ໂດຍມີ 2 ເປົ້າໝາຍຫລັກຄື: 1. ສື່ມວນຊົນຂອງລັດ ແລະ ສື່ພາກສັງຄົມທີ່ໄດ້ລົງທະບຽນຖືກຕ້ອງຕາມກົດໝາຍ ສປປ ລາວ ຈະໄດ້ຮັບການຍົກລະດັບທັກສະດ້ານວິຊາຊີບ ລວມທັງການນຳໃຊ້ເຕັກໂນໂລຊີແບບດີຈິຕອນ ແລະ ສື່ແບບໃໝ່ເພື່ອເຮັດໃຫ້ປະຊາຊົນໄດ້ຮັບຂໍ້ມູນຂ່າວສານທີ່ມີຄຸນນະພາບ ໂດຍຜ່ານການລາຍງານທີ່ມີຄວາມຮັບຜິດຊອບ ແລະ ເປັນມືອາຊີບກ່ຽວກັບການພັດທະນາສີຂຽວ; 2. ບັນດາຜູ້ເຂົ້າຮ່ວມຈາກອົງການຈັດຕັ້ງທາງສັງຄົມທີ່ເຮັດວຽກກ່ຽວກັບການພັດ ທະນາສີຂຽວ ຊຶ່ງລະບຸຢູ່ໃນກິດຈະກຳ, ຜູ້ນໍາໃຊ້ສື່ສັງຄົມອອນລາຍທົ່ວໄປ, ຜູ້ສ້າງວິດີໂອ ແລະ ຮູບເງົາໄດ້ຮັບການຍົກລະດັບຄວາມຮູ້ ແລະ ຄວາມສາມາດຂອງຕົນໃນການປະກອບສ່ວນສ້າງນະໂຍບາຍ, ຕິດຕາມ ແລະ ຊຸກຍູ້ວຽກງານການພັດທະນາສີຂຽວທີ່ມີຜົນກະທົບຕໍ່ຊຸມຊົນ ລວມທັງການນຳໃຊ້ເຕັກໂນໂລຊີດີຈິຕອນ ແລະ ສື່ແບບໃໝ່ຢ່າງສ້າງສັນ.