ນັບແຕ່ປີ 2022 ເປັນຕົ້ນມາລັດຖະບານໄດ້ມີນະໂຍບາຍເປີດກວ້າງການທ່ອງທ່ຽວ ເຫັນວ່າມີນັກທ່ອງທ່ຽວຕ່າງປະເທດເຂົ້າມາທ່ຽວ ໃນ ສປປ ລາວ ຫຼາຍຂຶ້ນ ໂດຍສະເພາະແມ່ນນັກທ່ອງທ່ຽວ ຈາກ ສປ ຈີນ ສະນັ້ນ ເພື່ອເປັນການດຶງດູດນັກທ່ອງທ່ຽວ ລັດຖະບານຈິ່ງໄດ້ເປີດກ້ວາງ ແລະ ຄົ້ນຄ້ວາສິ່ງອໍານວຍຄວາມສະດວກໃຫ້ກັບນັກທ່ອງທ່ຽວກຸ່ມເປົ້າໝາຍ ທີ່ໄດ້ເດີນທາງ ເຂົ້າ-ອອກ ສປປ ລາວ ໃຫ້ສະດວກຫຼາຍຂຶ້ນ ເພື່ອເປັນການຈັດຕັ້ງຜັນຂະຫຍາຍ ແລະ ປະຕິບັດແຈ້ງ ການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 704/ຫກ.ກສ.4 ລົງວັນທີ 22 ພຶດສະພາ 2024 ວ່າດ້ວຍທິດຊີ້ນໍາກ່ຽວກັບການຄົ້ນຄວ້ານະໂຍບາຍວິຊາ (VISA) ແລະ ການພັກເຊົາຢູ່ ສປປ ລາວ ສໍາລັບນັກທ່ອງທ່ຽວກຸ່ມເປົ້າໝາຍໃນໄລຍະປີທ່ອງທ່ຽວລາວ 2024.

ດັ່ງນັ້ນ ລັດຖະມົນຕີ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ຈິ່ງໄດ້ອອກຄໍາແນະນໍາໃນການຈັດຕັ້ງປະຕິບັດເຊິ່ງມີລາຍລະອຽດ ດັ່ງລຸ່ມນີ້:

I. ນະໂຍບາຍວິຊາ ເພີ່ມໄລຍະຂອງການພັກເຊົາ ແລະ ຂະຫຍາຍຂອບເຂດການເດີນ ທາງຂອງຜູ້ໃຊ້ປຶ້ມ/ໃບຜ່ານແດນ.

1. ສໍາລັບນັກທ່ອງທ່ຽວທຸກໆປະເທດທີ່ຈະເຂົ້າມາ ສປປ ລາວ ເປັນກຸ່ມຜ່ານການບໍລິການຂອງບໍລິສັດນໍາທ່ຽວ ທີ່ຢູ່ ສປປ ລາວ ທີ່ໄດ້ລົງທະບຽນຖືກຕ້ອງຕາມລະບຽບຫຼັກການໂດຍຮັບຮອງຈາກກະຊວງ ຖວທ, ບໍລິສັດນໍາທ່ຽວ ຕ້ອງເຮັດລາຍຊື່ຄັດຕິດໃບສະເໜີເຖິງກົມຕຳຫຼວດກວດຄົນເຂົ້າ-ອອກເມືອງ ເພື່ອອໍານວຍຄວາມສະດວກໃຫ້ແກ່ ນັກທ່ອງທ່ຽວໃນການເດີນທາງເຂົ້າ-ອອກ ຢ່າງສະດວກຄ່ອງຕົວ.

2. ສໍາລັບນັກທ່ອງທ່ຽວຈີນ ລວມທັງຜູ້ທີ່ຖືໜັງສືຜ່ານແດນຮົງກົງ ມາເກົ່າ ແລະ ໄຕ້ຫວັນ ທີ່ມາທ່ອງທ່ຽວເປັນກຸ່ມ ໃນນາມບໍລິສັດນໍາທ່ຽວ ເຫັນດີໃຫ້ຈັດຕັ້ງປະຕິບັດການຍົກເວັ້ນວິຊາ ແບບບໍ່ຕິດວິຊາສະຕິກເກີໃສ່ໜັງສືຜ່ານແດນ (ທຳມະດາ) ໃນໄລຍະພັກເຊົາ 15 ວັນ ແຕ່ຕ້ອງໃຫ້ຜ່ານການບໍລິການຂອງບໍລິສັດນໍາທ່ຽວ ທີ່ຢູ່ ສປປ ລາວ ແລະ ໄດ້ລົງທະບຽນ ຮັບຮອງຈາກ ກະຊວງ ຖວທ ແລະ ເຫັນດີໃຫ້ມີການພັກເຊົາ ຢູ່ ສປປ ລາວ ເປັນເວລາ 15 ວັນ ສະເພາະນັກທ່ອງທ່ຽວຈີນເປັນກຸ່ມທີ່ຖືໜັງສືຜ່ານແດນໄດ້ຫວັນ ແມ່ນໃຫ້ອອກວິຊາປິວຄືເກົ່າຕາມລະບຽບການ ແຕ່ບໍ່ຕິດວິຊາສະຕິກເກີ.

3. ສໍາລັບນັກທ່ອງທ່ຽວທີ່ນໍາໃຊ້ໜັງສືຜ່ານແດນ ຈາກປະເທດ ອົດສະຕຣາລີ ນິວຊີແລນ ອາເມລິກາ ແລະ ການາດາ ໂອຜິດ ແບນຊິກ ເດັນມາກ ແຟງລັງ ຝຣັ່ງ ເຢຍ ລະມັນ ເກຣັກ ໄອແລນ ອີຕາລີ ໂຮນລັງ ນອກແວ ໂປແລນ ປອກຕຸ້ນການ ຣັດເຊຍ ແອດສະປາຍ ຊູແອັດ ສະວິດສະແລນ ແລະ ອັງກິດ ສາມາດສະເໜີຂໍວິຊາເຂົ້າ-ອອກ ຫຼາຍ ຄັ້ງ ຢູ່ສະຖານທູດ ຫຼື ສະຖານກົງສູນ ແຫ່ງ ສປປ ລາວ ປະຈຳ ຢູ່ຕ່າງປະເທດ ໂດຍການເຫັນດີອະນຸມັດຈາກກົມ ກົງສູນ ກະຊວງການຕ່າງ ປະເທດ ໃນກໍລະນີຂໍວິ ຊາກັບດ່ານຫຼື ວິຊາອອນໄລ (E-VISA) ແມ່ນຈະໄດ້ຮັບວິຊາ ເຂົ້າ ສປປ ລາວ ໄດ້ພຽງ 1 ຄັ້ງ ຕາມລະບຽບການ ແລະ ໃຫ້ເພີ້ມກຳນົດໄລຍະເວລາພັກເຊົາ ຈາກ 30 ວັນ ເປັນ 60 ວັນ.

4. ສໍາລັບນັກທ່ອງທ່ຽວຂອງ 8 ປະເທດຄື: ເດັນມາກ ນອກແວ ແຟງລັງ ຊູແອດ ໂອຜິດ ແບນຊິກ ແອດສະປາຍ ແລະເກຣັກ ທີ່ມີຈຸດປະສົງເດີນທາງເຂົ້າມາທ່ຽວ ສປປ ລາວ ແມ່ນໃຫ້ຍົກເວັ້ນວິຊາເຂົ້າ 1 ຄັ້ງ ແບບບໍ່ຕິດວິຊາ ສະຕິກເກີໃສ່ໜັງສືຜ່ານແດນ ແລະ ສາມາດພັກເຊົາ ຢູ່ ສປປ ລາວ ໄດ້ 15 ວັນ.

5. ສໍາລັບນັກທ່ອງທ່ຽວມາຈາກປະເທດໄທ ທີ່ນໍາໃຊ້ປື້ມຜ່ານແດນ (Border Pass) ແລະ ໃບຜ່ານແດນຊົ່ວຄາວ(Temporary Border pass) ແມ່ນເຫັນດີໃຫ້ເພີ່ມໄລຍະເວລາພັກເຊົາຈາກ 3 ວັນເປັນ 10 ວັນ ແລະ ສາມາດເດີນທາງໄປຕໍ່ໄດ້ອີກ 3 ແຂວງຕິດຈອດກັນ ແລະ ກັບຄືນໄປອອກດ່ານເກົ່າທີ່ເດີນທາງເຂົ້າມາ ແຕ່ຕ້ອງຜ່ານການ ບໍລິການຂອງບໍລິສັດນໍາທ່ຽວ ທີ່ໄດ້ລົງທະບຽນ ຮັບຮອງຈາກ ກະຊວງ ຖວທ.

6. ສໍາລັບນັກທ່ອງທ່ຽວມາຈາກປະເທດ ສສ ຫວຽດນາມ ທີ່ນໍາໃຊ້ປື້ມຜ່ານແດນ (Border Pass) ແລະ ໃບຜ່ານ ແດນຊົ່ວຄາວ (Temporary Border pass) ແມ່ນປະຕິບັດຕາມກອບສັນຍາສອງຝ່າຍທີ່ມີຢູ່ແລ້ວ (15ວັນ) ສາມາດເດີນທາງໄປຕໍ່ໄດ້ອີກ 3 ແຂວງຕິດຈອດກັນ ແລະ ກັບຄືນໄປອອກດ່ານເກົ່າທີ່ເດີນທາງເຂົ້າມາ ແຕ່ຕ້ອງຜ່ານການບໍລິການຂອງບໍລິສັດນໍາທ່ຽວ ທີ່ໄດ້ລົງທະບຽນຮັບຮອງຈາກກະຊວງ ຖວທ.

7. ສໍາລັບນັກທ່ອງທ່ຽວມາຈາກ ສປ ຈີນ ທີ່ນໍາໃຊ້ປື້ມຜ່ານແດນ (Border Pass) ແມ່ນເຫັນດີປະຕິບັດຕາມສັນຍາ ສອງຝ່າຍ ເຊິ່ງໄດ້ປະຕິບັດກຳນົດໃຫ້ 10 ວັນ ສາ ມາດຕໍ່ພັກເຊົາໄດ້ ແລະ ສາມາດເດີນທາງຜ່ານເສັ້ນທາງລົດໄຟ ລາວ-ຈີນ ແຕ່ແຂວງຫຼວງນໍ້າທາ ຮອດນະຄອນຫຼວງວຽງຈັນ (ສາມາດທ່ອງທ່ຽວໄດ້ໃນແຂວງອຸດົມໄຊ ຫຼວງພະບາງ ແຂວງວຽງຈັນ ນະຄອນຫຼວງວຽງຈັນ) ແລະ ກັບຄືນໄປອອກດ່ານເກົ່າທີ່ເດີນທາງເຂົ້າມາ ສປປ ລາວ ແຕ່ ຕ້ອງຜ່ານການບໍລິການຂອງບໍລິສັດນໍາທ່ຽວທີ່ໄດ້ລົງທະບຽນຮັບຮອງຈາກ ກະຊວງ ຖວທ.

8. ນັກທ່ອງທ່ຽວທີ່ເດີນທາງມາດ້ວຍຕົນເອງແບບປົກກະຕິທົ່ວໄປແມ່ນອະນຸຍາດໃຫ້ໄປຕາມຂອບເຂດທີ່ໄດ້ກຳນົດ ໄວ້ໃນສັນຍາລະຫວ່າງປະເທດ (ສັນຍາສອງຝ່າຍ) ຕາມທີ່ເຄີຍໄດ້ປະຕິບັດຜ່ານມາ.

II. ການຈັດຕັ້ງປະຕິບັດ.

1. ມອບໃຫ້ບັນດາກົມ ໃນຂະແໜງການທ່ອງທ່ຽວ ພະແນກຖະແຫຼງຂ່າວ ວັດທະນາທຳ ແລະ ທ່ອງທ່ຽວ ແຂວງ/ນະ ຄອນຫຼວງ ເອົາໃຈໃສ່ໃນການປະສານສົມທົບກັບຂະ ແໜງການທີ່ກ່ຽວຂ້ອງ ເພື່ອຕິດຕາມກວດກາ ແລະ ຊຸກຍູ້ ໃຫ້ບັນ ດາຫົວໜວ່ຍທຸ ລະກິດ ໃນຂະແໜງການທ່ອງທ່ຽວ ທີ່ມີຈຸດປະສົງໃນການນໍາເຂົ້ານັກທ່ອງທ່ຽວ ຕ່າງປະເທດ ຈາກບັນດາປະເທດທີ່ລັດຖະບານໄດ້ມີນະໂຍບາຍວິຊາ (VISA) ໃຫ້ມີການເຄື່ອນໄຫວຢ່າງຖືກ ຕ້ອງຕາມຂັ້ນຕອນ ລະບຽບກົດ ໝາຍທີ່ກ່ຽວຂ້ອງວາງອອກ ແລະ ປະຕິບັດມາດຕະການຢ່າງເຂັ້ມງວດ ພ້ອມທັງ ໂຄສະນາເຜີຍແຜ່ລະບຽບການ ແລະ ນະ ໂຍບາຍດັ່ງກ່າວ ໃຫ້ຮັບຮູ້ຢ່າງທົ່ວເຖິງທັງພາຍໃນ ແລະ ຕ່າງປະເທດ.

2. ມອບໃຫ້ກົມແຜນການ ແລະ ການຮ່ວມມືສາກົນ ກົມຄຸ້ມຄອງທຸລະກິດການທ່ອງ ທ່ຽວປະສານສົມທົບກັບພາກ ສ່ວນກ່ຽວຂ້ອງຂອງ ສປ ຈີນ ເພື່ອປ້ອງກັນ ແລະ ແກ້ ໄຂບັນຫາທົ່ວສູນຫຼຽນ ໂດຍການກໍານົດລາຍຊື່ບໍລິສັດນໍາ ທ່ຽວຢູ່ ສປປ ລາວ ທີ່ເຮັດການຕະຫຼາດຈີນ ຫຼື ນໍາເຂົ້ານັກທ່ອງທ່ຽວຈີນ ເພື່ອສົ່ງໃຫ້ລັດຖະບານຈີນ ຫຼື ສະຖານ ທູດຈີນ ສະຖານກົງສູນຈີນ ປະຈຳ ສປ ລາວ ແລະ ສະຖານທູດລາວ ສະຖານກົງສູນລາວ ປະຈຳ ສປ ຈີນ ພ້ອມທັງຂໍລາຍຊື່ບໍລິສັດນໍາທ່ຽວ ຢູ່ ສປ ຈີນ ທີ່ດຳເນີນທຸລະກິດນໍາທ່ຽວ ທີ່ຈະນໍານັກທ່ອງທ່ຽວຈີນເຂົ້າມາ ສປປ ລາວ ເພື່ອແຈ້ງມາຍັງກະຊວງການຕ່າງປະເທດໂດຍໄວ.

3. ມອບໃຫ້ກົມຄຸ້ມຄອງທຸລະກິດການທ່ອງທ່ຽວ ປະສານສົມທົບກັບບັນດາສະມາຄົມທຸລະກິດການທ່ອງທ່ຽວໃນ ການຄັດເລືອກເອົາຫົວໜວ່ຍທຸລະກິດນໍາທ່ຽວທີ່ມີການຕະຫຼາດຈີນ ເພື່ອສະເໜີການນໍາຂອງກະຊວງ ຖວທ ຮັບຮອງ ພ້ອມທັງລົງຕິດຕາມາກວດກາຫົວໜ່ວຍທຸລະກິດທ່ອງທ່ຽວຂອງຈີນ ທີ່ດໍາເນີນທຸລະກິດ ຢູ່ ສປປ ລາວ ຢ່າງເປັນປົກະຕິ ແລະ ຊຸກຍູ້ໃຫ້ທຸລະກິດດັ່ງກ່າວໄດ້ເອົາໃຈໃສ່ດໍາເນີນການຢ່າງຖືກຕ້ອງຖ້າມີການກະທໍາຜິດແມ່ນ ໃຫ້ປະຕິບັດມາດຕະການ ແລະ ປັບໄໝ ຕາມລະບຽບກົດໝາຍກ່ຽວຂ້ອງຢ່າງເຂັ້ມງວດ.

4. ມອບໃຫ້ກົມກົງສູນກະຊວງການຕ່າງປະເທດ ແລະ ກົມຕຳຫຼວດກວດຄົນເຂົ້າ-ອອກເມືອງ ກະຊວງ ປ້ອງກັນຄວາມສະຫງົບ ເຮັດໜັງສືແຈ້ງການເປັນລາຍລັກອັກ ສອນ ເພື່ອແຈ້ງໄປຍັງສາຍຕັ້ງຂອງຕົນ ໃນການຈັດຕັ້ງປະຕິບັດ ໃຫ້ໄປຕາມທິດຊີ້ນໍາຂອງລັດຖະບານ.

5. ມອບໃຫ້ກົມໂຄສະນາການທ່ອງທ່ຽວ ກົມສື່ມວນຊົນ ກະຊວງ ຖວທ ໃນການເຜີຍ ແຜ່ນະໂຍບາຍວິຊາ ແລະ ການພັກເຊົາ ຢູ່ ສປປ ລາວ ໃຫ້ແກ່ບັນດາທຸລະກິດນໍາທ່ຽວ ທັງພາຍໃນ ແລະ ຕ່າງປະເທດ ໄດ້ຮັບຊາບໂດຍໄວ ພ້ອມທັງປະສານສົມທົບກັບບັນ ດາສະຖານທູດ ສະຖານກົງສູນ ເພື່ອໂຄສະນາເຜີຍແຜ່ ໂດຍຜ່ານຫຼາຍຊ່ອງທາງ ໃຫ້ເຂົ້າເຖິງກຸ່ມເປົ້າໝາຍທາງອອນລາຍ ແລະ ອອັບລາຍ.

6. ໃຫ້ປະຕິບັດຂັ້ນຕອນການແຈ້ງລາຍຊື່ນັກທ່ອງທ່ຽວທີ່ຜ່ານການບໍລິການຂອງບໍລິສັດນໍາທ່ຽວຂອງລາວ ແລະ ຄູ່ສັນ ຍາຂອງບໍລິສັດນໍາທ່ຽວຂອງ ສປ ຈີນ ກ່ອນການນໍາເຂົ້ານັກທ່ອງທ່ຽວຕາມນະໂຍບາຍການຍົກເວັ້ນວິຊາ ແລະ ໄລຍະຂອງການພັກເຊົາ.

7. ສໍາລັບວັນ ເວລາ ໃນການຈັດຕັ້ງປະຕິບັດ ແລະ ວັນ ເວລາສິ້ນສຸດການຈັດຕັ້ງປະຕິບັດ ແມ່ນເລີ່ມແຕ່ວັນທີ 1 ກໍລະກົດ 2024 ຫາ ວັນທີ 31 ທັນວາ 2024.

8. ເພື່ອເປັນການສົ່ງເສີມການທ່ອງທ່ຽວ ແລະ ບໍ່ສ້າງຄວາມກົດດັນໃຫ້ນັກທ່ອງທ່ຽວຈິ່ງໃຫ້ຍົກເລີກການຕິດຕາມ ຂອງເຈົ້າໜ້າທີ່ຕຳຫຼວດທ່ອງທ່ຽວ ໄປນໍາຂະບວນລົດນໍາທ່ຽວ ເພື່ອຫຼຸດຜ່ອນຄ່າໃຊ້ຈ່າຍຂອງບໍລິສັດນໍາທ່ຽວ.