ຂໍ້ມູນຈາກ ໜສພ ວຽງຈັນໃໝ່

ວັນທີ 15 ມິຖຸນາ 2024 ທ່ານ ສິລິລາດທົງສິນ ທອງເພັງ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍການນຳນະຄອນຫຼວງວຽງຈັນ ໄດ້ເດີນທາງລົງຢ້ຽມຢາມການຜະລິດຢູ່ ບ້ານປາກບຶງ ເມືອງປາກຊັນ ແຂວງ ບໍລິຄຳໄຊ ໃນໂອກາດເດີນທາງເຂົ້າຮ່ວມກອງປະຊຸມພົບປະເພື່ອສົ່ງເສີມການຮ່ວມມື ລະຫວ່າງ ແຂວງບໍລິຄຳໄຊ ແລະ ນະຄອນຫຼວງວຽງຈັນ ໂດຍການຕ້ອນຮັບຂອງ ທ່ານ ບຸນລ້ຽງ ດວງສະເພົາ ຫົວໜ້າພະແນກການເງິນແຂວງບໍລິຄຳໄຊ ພ້ອມຄະນະ.

ໃນໂອກາດນີ້ ທ່ານ ນາງ ນ້ອຍ ຄອບຄົວຕົວແບບລ້ຽງປາດຸກ ຕັ້ງຢູ່ ບ້ານ ປາກບຶງ ເມືອງ ປາກຊັນ ແຂວງ ບໍລິຄຳໄຊ ໄດ້ລາຍງານໃຫ້ຮູ້ວ່າ: ໃນເມື່ອກ່ອນແມ່ນໄດ້ປະກອບອາຊີບກະສິກຳເຮັດນາ ເມື່ອເຫັນໝູ່ເພື່ອນລ້ຽງປາດຸກເປັນສິນຄ້າແລ້ວສາມາດສ້າງເສດຖະກິດຄອບຄົວໄດ້ ຂ້າພະເຈົ້າຈຶ່ງໄດ້ມີຄວາມສົນໃຈແລ້ວໄດ້ໄປຮຽນຮູ້ເຕັກນິກການລ້ຽງນຳເພີ່ນແລ້ວຈຶ່ງຕັດສິນໃຈມາຂຸດໜອງເພື່ອລ້ຽງປາດຸກ ໃນເບື້ອງຕົ້ນໄດ້ທົດລອງລ້ຽງພຽງແຕ່ ສອງ ສາມໜອງ ເມື່ອລ້ຽງປາດຸກມາໄດ້ໄລຍະໜຶ່ງເຫັນວ່າຕະຫຼາດມີຄວາມຕ້ອງການສູງຈຶ່ງໄດ້ຂະຫຍາຍໜອງອອກມາເລື້ອຍໆ ຈົນເຖິງປັດຈຸບັນມີທັງໝົດ 16 ໜອງ ເຊິ່ງໃນ 1 ໜອງແມ່ນຈະປ່ອຍລູກປາດຸກລົງລ້ຽງປະມານ 25 ພັນໂຕຕໍ່ໜອງ ສຳລັບແນວພັນແມ່ນນຳເຂົ້າມາຈາກປະເທດໃກ້ຄຽງ ເຊິ່ງໃຊ້ໄລຍະເວລາການລ້ຽງປະມານ 4 ເດືອນຈຶ່ງສາມາດນຳອອກຂາຍໄດ້ ເຊິ່ງໃນການຈຳໜ່າຍແມ່ນຈະເອົາອອກຄັ້ງລະ 2 ໜອງ ຈະໄດ້ປາດຸກປະມານ 7 ຫາ 8 ໂຕນຕໍ່ຄັ້ງ ຈຳໜ່າຍອອກໃນລາຄາ 29 ຫາ 30 ພັນກີບຕໍ່ກິໂລ ໃນການຈຳໜ່າຍຈະມີແມ່ຄ້າຄົນກາງມາຮັບຊື້ ເພື່ອນຳໄປຈຳໜ່າຍຕໍ່ຢູ່ພາຍໃນແຂວງບໍລິຄຳໄຊ ແລະ ສົ່ງອອກແຂວງໃກ້ຄ່ຽງ ສະເລ່ຍລາຍຮັບຫຼັງຫຼັກຄ່າລົງທຶນອອກຈະໄດ້ປະມານ 100 ລ້ານກວ່າກີບຕໍ່ປີ.

ພາຍຫຼັງທີ່ຕົນເອງໄດ້ຫັນມາປະກອບອາຊີບລ້ຽງປາດຸກເປັນສິນຄ້າ ກໍສາມາດ ສ້າງຄວາມເຂັ້ມແຂງທາງດ້ານເສດຖະກິດຄອບຄົວຕາມແນວທາງນະໂຍບາຍຂອງພັກ ສາມາດເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງໄດ້.