ລັດຖະບານ ໄດ້ມີມາດຕະການຄຸ້ມຄອງຢ່າງເຄັ່ງຄັດ ສຳລັບການດຳເນີນໂຄງການພັດ ທະນາ ຫຼື ກິດຈະກຳການເຄື່ອນໄຫວທາງດ້ານເສດຖະກິດ-ສັງຄົມ ທີ່ອາດກໍ່ໃຫ້ເກີດມີຜົນກະທົບທາງລົບຕໍ່ມໍລະດົກແຫ່ງຊາດໂດຍກົງ ຫຼື ທາງອ້ອມ ປັດຈຸບັນ ໄດ້ນຳເອົາມາດຕະການດັ່ງກ່າວເຂົ້າໃນກົດໝາຍວ່າດ້ວຍມໍລະດົກແຫ່ງຊາດ (ສະບັບປັບປຸງ) ທີ່ຖືກຮັບຮອງໃນປີ 2021.

ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວທ) ໄດ້ຊີ້ແຈງຫລາຍບັນຫາສໍາຄັນຂອງສະມາຊິກສະພາແຫ່ງ ຊາດ (ສສຊ) ຢູ່ກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນວັນທີ 14 ມິຖຸນາ 2024 ກ່ຽວກັບມາດຕະການຄຸ້ມຄອງ ປົກປັກຮັກສາ ອະນຸລັກ ບູລະນະ ແລະ ປະຕິສັງຂອນມໍລະດົກແຫ່ງຊາດ ໂດຍທ່ານໄດ້ກ່າວວ່າ: ການດຳເນີນໂຄງການພັດທະນາ ຫຼື ກິດຈະກຳການເຄື່ອນໄຫວທາງດ້ານເສດຖະກິດ-ສັງຄົມ ທີ່ອາດກໍ່ໃຫ້ເກີດມີຜົນກະທົບທາງລົບຕໍ່ມໍລະດົກແຫ່ງຊາດໂດຍກົງ ຫຼື ທາງອ້ອມ ລັດ ຖະບານ ໄດ້ມີມາດຕະການຄຸ້ມຄອງຢ່າງເຄັ່ງຄັດ ເຊິ່ງໄລຍະຜ່ານມາ ທຸກໆໂຄງການທີ່ນອນຢູ່ໃນພື້ນທີ່ມໍລະດົກ ຫຼື ເຂດພື້ນທີ່ອ້ອມຂ້າງແຫຼ່ງມໍລະດົກ ຈະຕ້ອງໄດ້ຮັບການພິຈາລະນາ ແລະ ອະນຸມັດຈາກຄະນະກໍາມະການມໍລະດົກທ້ອງຖິ່ນ ແລະ ຄະນະກຳມະ ການ ຄຸ້ມຄອງມໍລະດົກແຫ່ງຊາດ ຕາມລຳດັບ.

ພ້ອມນັ້ນ ລັດຖະບານ ໄດ້ມອບໃຫ້ ກະຊວງ ຖວທ ດຳເນີນການສຶກສາ ຄົ້ນຄວ້າ ເພື່ອສ້າງເຄື່ອງມື ແລະ ກົນໄກ ໃນການຈັດຕັ້ງປະຕິບັດວຽກງານປະເມີນຜົນກະທົບຕໍ່ມໍລະ ດົກ ເຊິ່ງມາຮອດປັດຈຸບັນ ກະຊວງ ຖວທ ໄດ້ສຳເລັດ ແລະ ໄດ້ນຳເອົາມາດຕະການ ໃນການປະເມີນຜົນກະທົບດັ່ງກ່າວ ກໍານົດເຂົ້າຢູ່ໃນພາກທີ 6 ມາດຕາ 65 ແລະ ມາດຕາ 66 ຂອງກົດໝາຍວ່າດ້ວຍມໍລະດົກແຫ່ງຊາດ (ສະບັບປັບປຸງ) ທີ່ຖືກຮັບ ຮອງໃນປີ 2021 ທີ່ຜ່ານມາ ພ້ອມນັ້ນ ໄດ້ສຳເລັດການສ້າງຄູ່ມືພື້ນຖານໃນການຈັດ ຕັ້ງປະຕິບັດວຽກງານປະເມີນຜົນກະທົບດັ່ງກ່າວ.