ທ່ານ ນາງ ລໍາພອຍ ສີອັກຄະຈັນ ຮອງປະທານສະພາປະຊາຊົນນະຄອນຫຼວງວຽງຈັນ (ນວ) ແລະ ທ່ານ ແກ້ວວິໄລສັກ ແສນສັກດາ ຮອງຫົວໜ້າພະແນກຖະແຫຼ່ງຂ່າວ ວັດທະນະທຳ ແລະ ທ່ອງທ່ຽວ ຖວທ ນວ ພ້ອມພະນັກງານວິຊາການຂະແໜງການອ້ອມຂ້າງ ເຂົ້າຮ່ວມພິທີສະເຫຼີມສະຫຼອງປີທ່ອງທ່ຽວລາວ 2024.

ການເຂົ້າຮ່ວມຄັ້ງນີ້ ຖືວ່າເປັນການປະກອບສ່ວນສຳຄັນເຂົ້າໃນການສົ່ງເສີມການທ່ອງທ່ຽວຂອງແຂວງໄຊສົມບູນ ພ້ອມທັງເປັນໂອກາດອັນດີໃນການແລກປ່ຽນບົດຮຽນໂດຍສະເພາະວຽກງານການທ່ອງທ່ຽວຂອງນະຄອນຫຼວງວຽງຈັນ ແລະ ແຂວງໄຊສົມບູນ ແນໃສ່ເຮັດໃຫ້ວຽກງານດັ່ງກ່າວໃນສອງແຂວງໄດ້ມີການພັດທະນານັບມື້ເຕີບໃຫຍ່ ປະກອບສ່ວນພັດທະນາການທ່ອງທ່ຽວລາວໃຫ້ນັບມື້ເຕີບໃຫຍ່ເຂັ້ມແຂງ.

ເຊິ່ງພິທີດັ່ງກາວຈັດຂຶ້ນ ໃນວັນທີ 30 ພະຈິກ 2024 ທີ່ສະໂມສອນປົກຄອງເມືອງອະນຸວົງ ຈັດພິທີສະເຫຼີມສະຫຼອງປີທ່ອງທ່ຽວລາວ 2024 ເປັນປະທານຂອງ ທ່ານ ພອຍຄໍາ ຮຸ່ງບຸນຍວງ ເຈົ້າແຂວງໄຊສົມບູນ ມີບັນດາການນຳ ມີການນໍາ 6 ແຂວງອ້ອມຂ້າງ ການນໍາແຂວງເມືອງ ອະດີດການນໍາແຂວງ ພະນັກງານບຳນານປະຕິວັດອາວຸໂສ ທະຫານ ຕຳຫຼວດ ນັກທຸລະກິດ ແລະ ຂະແໜງການກ່ຽວຂ້ອງເຂົ້າຮ່ວມ.

ໃນໂອກາດເຂົ້າຮ່ວມພິທີຄັ້ງນີ້ພະແນກ ຖວທ ນວ ຍັງໄດ້ມອບເງິນ 3 ລ້ານກີບໃຫ້ແຂວງໄຊສົມບູນເພື່ອຊຸກຍູ້ວຽກງານການທ່ອງທ່ຽວກ່າວມອບໂດຍທ່ານ ແກ້ວວິໄລສັກ ແສນສັກດາ ແລະ ກ່າວຮັບໂດຍທ່ານເຈົ້າແຂວງໄຊສົມບູນ ພ້ອມນີ້ຄະນະຍັງໄດ້ໄປທ່ຽວຊົມສະຖານທີ່ທ່ອງທ່ຽວທຳມະຊາດ ວັດທະນະທຳ ແລະ ປະຫວັດສາດຈຳນວນໜຶ່ງຢູ່ແຂວງໄຊສົມບູນຕື່ມອີກເປັນຕົ້ນສະຖານທີ່ທ່ອງທ່ຽວພູເບ້ຍ ພູຫົວໂລ້ນ ວັງນໍ້າຂຽວ ຖໍ້າເຈົ້າອະນຸວົງ ຫໍຫຼັກເມືອງ ທ່ຽວຊົມງານວາງສະແດງສິນຄ້າ ແລະ ອື່ນໆ.