ຂໍ້ມູນຈາກ: ໜັງສືພິມວຽງຈັນໃໝ່

ສປປ ລາວ ຮ່ວມກັບກອງເລຂາອາຊຽນ ໂດຍໄດ້ຮັບການສະໜັບສະໜູນຈາກອົງການຮ່ວມມື ລາວ-ເຢຍລະມັນ (GIZ) ຈັດກອງປະຊຸມເວທີສື່ມວນຊົນອາຊຽນ ຄັ້ງທີ 8 ໃນວັນທີ 25 ພະຈິກ 2024 ທີ່ນະຄອນຫຼວງວຽງຈັນ ໂດຍມີ ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ ທ່ານ ນາງ ນິໂຄ ສະເຕັກແມນ (Nicole Stechmann) ອຸປະທູດເຢຍລະມັນ ປະຈໍາລາວ ພ້ອມດ້ວຍແຂກຮັບເຊີນ ແລະ ສື່ມວນຊົນຈາກປະເທດສະມາຊິກອາຊຽນ ເຂົ້າຮ່ວມ.

ຈຸດປະສົງຂອງກອງປະຊຸມຄັ້ງນີ້ ເພື່ອເປີດໂອກາດໃຫ້ສື່ມວນຊົນຈາກປະເທດສະມາຊິກອາຊຽນໄດ້ແລກປ່ຽນຄວາມຄິດຄວາມເຫັນຮ່ວມກັນຫຼາຍບັນຫາສຳຄັນທີ່ຕິດພັນກັບການປະຕິບັດແຜນວຽກງານການເຊື່ອມໂຍງ-ເຊື່ອມຈອດ ກໍຄືຜົນໄດ້ຮັບ ແລະ ຄວາມຄາດຫວັງຕໍ່ໜ້າຂອງວຽກງານຂອງອາຊຽນ.

ໂອກາດນີ້ ທ່ານ ໂພສີ ແກ້ວມະນີວົງ ໃຫ້ຮູ້ວ່າ: ກອງປະຊຸມຄັ້ງນີ້ ຖືເປັນການສະແດງຄວາມຊົມເຊີຍຕໍ່ວິໄສທັດຮ່ວມກັນຂອງອາຊຽນທີ່ມີການເຊື່ອມໂຍງ ເຊິ່ງສະທ້ອນໃຫ້ເຫັນເຖີງຫົວຂໍ້ຂອງການເປັນປະທານອາຊຽນຂອງ ສປປ ລາວ ໃນປີ 2024 ແລະ ສອດຄ່ອງກັບປີທ່ອງທ່ຽວລາວ 2024 ຖືເປັນປີທີ່ໜ້າສົນໃຈ ແລະ ເວທີສື່ມວນຊົນອາຊຽນຄັ້ງນີ້ ແມ່ນເປັນສ່ວນສໍາຄັນຂອງແຜນແມ່ບົດການສື່ສານອາຊຽນ 2018-2025 (ASEAN Communication Master Plan 2018–2025) ທັງເປັນເວທີສໍາລັບສື່ມວນຊົນໃນອາຊຽນໄດ້ແລກປ່ຽນຄໍາຄິດຄໍາເຫັນຮ່ວມກັນ ກອງປະຊຸມຄັ້ງນີ້ ນອກຈາກຈັດຂຶ້ນໃນເວລາທີ່ເໝາະສົມ ຍັງຈັດຂຶ້ນໃນທ່າມກາງບັນຍາກາດທີ່ ສປປ ລາວ ກໍາລັງກະກຽມສະເຫຼີມສະຫຼອງວັນຊາດ ວັນທີ 2 ທັນວາ ຄົບຮອບ 49 ປີ ໃນໂອກາດອັນໃກ້ນີ້.

ໂອກາດນີ້ ທ່ານ ກາວ ກິມຮຸນ (Kao Kim Hourn) ເລຂາ ທິການໃຫຍ່ອາຊຽນ ໄດ້ມີຄໍາເຫັນກ່າວເປີດກອງປະຊຸມຄັ້ງນີ້ໂດຍຜ່ານລະບົບອອນລາຍ ມີບາງຕອນກ່າວວ່າ: ນັບແຕ່ໄດ້ຮັບການສ້າງຕັ້ງໃນປີ 2017 ເວທີປຶກສາຫາລືນີ້ໄດ້ຈັດຂຶ້ນທຸກປີ ເຊິ່ງເປັນເວທີສົນທະນາທີ່ມີຄວາມໝາຍສໍາຄັນລະຫວ່າງຜູ້ກຳນົດນະໂຍບາຍຂອງອາຊຽນ ແລະ ບັນດາຜູ້ນຳສື່ມວນຊົນຂອງອາຊຽນ ຊຸກຍູ້ການແລກປ່ຽນຄວາມຄິດເຫັນ ແລະ ເພີ່ມທະວີຄວາມເຂົ້າໃຈທັດສະນະຂອງອາຊຽນຕໍ່ບັນດາບັນຫາທີ່ພົ້ນເດັ່ນ ນອກຈາກນີ້ ທ່ານຍັງໄດ້ເນັ້ນໜັກເຖິງບົດບາດສຳຄັນຂອງສື່ມວນຊົນໃນການຊຸກຍູ້ວາລະການເຊື່ອມໂຍງຂອງປະຊາຄົມອາຊຽນຫຼັງປີ 2025.