ກອງແລກປ່ຽນວຽກງານການທ່ອງທ່ຽວ ​​ໃນ​ໂອກາດເທສະການດອກງິ້ວບານ ຄັ້ງທີ XXI ປີ 2024 ຈັດຂຶ້ນວັນທີ 27 ມັງກອນ 2024 ຢູ່ເຂດເສດຖະກິດພິເສດສາມຫຼ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ໂດຍເປັນປະທານຂອງ ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ ມີທ່ານ ຄຳຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ ທ່ານ ຈ້າວ ເຫວີຍ ປະທານສະພາບໍລິຫານເຂດເສດຖະກິດພິເສດສາມຫຼ່ຽມຄໍາ ພ້ອມດ້ວຍຮອງຫົວໜ້າພະແນກຖະແຫຼງຂ່າວ ວັດທະ ນະທໍາ ແລະ ທ່ອງທ່ຽວ ນະຄອນຫຼວງວຽງຈັນ ຖວທ ແຂວງ ຜູ້ຕາງໜ້າຈາກຈີນ ຫວຽດນາມ ບໍລິສັດທ່ອງທ່ຽວ 70 ກວ່າຫົວໜ່ວຍ ແລະ ສື່ມວນຊົນພາຍໃນ ແລະ ຕ່າງປະ ເທດເຂົ້າຮ່ວມ.

ທ່ານ ບົວຄົງ ນາມມະວົງ ກ່າວວ່າ: ກອງປະຊຸມຄັ້ງນີ້ ເປັນກິດຈະກໍາການທ່ອງທ່ຽວລະດັບຊາດ ແລະ ​ມີ​ຄວາມ​ໝາຍ​ສໍາຄັນ ເຊິ່ງ​ຈະ​ໄດ້​​ຄົ້ນຄວ້າ ປະກອບ​ຄໍາ​ເຫັນ ແລະ ແລກ ປ່ຽນບົດຮຽນ ເພື່ອສົ່ງເສີມ ແລະ ໂຄສະນາການທ່ອງທ່ຽວຢູ່ແຂວງບໍ່ແກ້ວ​ ກໍຄືຢູ່ເຂດເສດຖະກິດພິເສດສາມຫຼ່ຽມຄໍາ ໃຫ້ໄດ້ຮັບການພັດທະນາ ປົກປັກຮັກສາ ແລະ ສືບຕໍ່ພັດ ທະນາແຫຼ່ງທ່ອງທ່ຽວຕ່າງໆ ເພື່ອເຊື່ອມໂຍງການທ່ອງ ທ່ຽວກັບບັນດາແຂວງ ແລະ ຕ່າງປະເທດ ໃຫ້ນັບມື້ກວ້າງ ຂວາງ ສປປ ລາວ ກໍຄື ແຂວງບໍ່ແກ້ວ ຕັ້ງຢູ່ໃຈກາງອະນຸ ພາກພື້ນລຸ່ມແມ່ນໍ້າຂອງ 4 ຫຼ່ຽມເສດຖະກິດ ມີທ່າແຮງບົ່ມຊ້ອນຫຼາຍດ້ານໃນການແລກປ່ຽນເສດຖະກິດ-ສັງຄົມ ການຄ້າ ການລົງທຶນ ແລະ ການເຊື່ອມໂຍງດ້ານການທ່ອງ ທ່ຽວກັບປະເທດໃກ້ຄຽງ ເພື່ອເສີມສ້າງການເຊື່ອມໂຍງການແລກປ່ຽນດ້ານການທ່ອງທ່ຽວ ແລະ ການຮ່ວມມືລະຫວ່າງແຂວງ ເຂດເສດຖະກິດພິ ເສດສາມຫຼ່ຽມຄໍາ ແລະ ບັນດາປະເທດ ພວກເຮົາຈຶ່ງເຊີນຜູ້ປະກອບການທ່ອງທ່ຽວ ນັກທຸລະກິດພາຍໃນ ແລະ ຕ່າງປະເທດ ແລະ ແຂວງໃກ້ຄຽງ ເຂົ້າຮ່ວມເພື່ອປຶກສາຫາລືແລກປ່ຽນຄວາມ ຄິດເຫັນ ແລະ ມີທັດ ສະນະຕໍ່ການຮ່ວມມືດ້ານການພັດ ທະນາການທ່ອງທ່ຽວ ການສົ່ງເສີມການຜະລິດ ສົ່ງເສີມການຄ້າ ການລົງທຶນຮ່ວມກັນ ພ້ອມທັງສ້າງສິ່ງອໍານວຍຄວາມສະດວກເຊິ່ງກັນ ແລະ ກັນ ໃນນີ້​ຈະໄດ້ຮັບຟັງການບັນ ຍາຍວຽກງານການທ່ອງທ່ຽວຈາກຊ່ຽວຊານ ສປ ຈີນ ການສົ່ງເສີມການທ່ອງທ່ຽວຢູ່ແຂວງບໍ່ແກ້ວ ການສົ່ງ ເສີມການທ່ອງທ່ຽວຢູ່ເຂດເສດຖະກິດພິເສດສາມຫຼ່ຽມຄໍາ ການພັດທະນາການທ່ອງທ່ຽວຂອງນະຄອນຫຼວງວຽງຈັນ ພ້ອມທັງ​ໄດ້ເປີດກວ້າງການປະກອບຄໍາຄິດເຫັນ ແລະ ແລກປ່ຽນບົດຮຽນເຊິ່ງກັນ ແລະ ກັນກ່ຽວກັບບາງບັນຫາທີ່ໃຫ້ຄວາມສົນໃຈ ຕື່ມອີກ.

ທ່ານ ສົມສັກ ມະຫາພົນ ຮອງຫົວໜ້າພະແນກ ຖວທ ແຂວງບໍ່ແກ້ວ ກ່າວວ່າ: ປັດຈຸບັນ ວຽກງານການທ່ອງທ່ຽວແຂວງບໍ່ແກ້ວ ໄດ້ກາຍເປັນໜຶ່ງໃນຂະແໜງຍຸດທະສາດທີ່ເປັນເສົາຄໍ້າໃນການພັດທະນາເສດ ຖະກິດ-ສັງຄົມຂອງປະເທດ ແຂວງບໍ່ແກ້ວຕັ້ງຢູ່ໃຈກາງອະນຸພາກພື້ນລຸ່ມແມ່ ນໍ້າຂອງ 4 ຫຼ່ຽມ ໄດ້ຖືເອົາວຽກງານການທ່ອງທ່ຽວເປັນບູລິມະສິດໜຶ່ງໃນໂຄງປະກອບການພັດທະນາເສດຖະກິດ-ສັງ ຄົມ ເພື່ອສົ່ງ ເສີມການຜະລິດເປັນສິນຄ້າ ການຂົນສົ່ງ ການບໍລິການ ການສ້າງວຽກເຮັດງານທຳ ສ້າງລາຍຮັບ ແລະ ປັງປຸງຊີວິດການເປັນຢູ່ຂອງປະຊາຊົນບັນດາເຜົ່າໃຫ້ດີຂຶ້ນ ໂດຍວຽກງານການທ່ອງທ່ຽວຂອງແຂວງບໍ່ແກ້ວ ໄດ້ມີບາດ ກ້າວຂະຫຍາຍຕົວຢ່າງຕໍ່ເນື່ອງ ສໍາລັບປີທ່ອງທ່ຽວລາວ 2024 ຈະຈັດ 14 ກິດຈະກຳສໍາຄັນ ໃນນີ້ກິດຈະກໍາລະດັບຊາດ 1 ກິດຈະກຳ ຄື: ເທດສະການດອກງິ້ວບານ ລະດັບແຂວງ 1 ກິດຈະກຳ ຄື: ງານບຸນບັນດາເຜົ່າ ແລະ ລະດັບເມືອງ 12 ກິດຈະກຳ ສະເພາະປີ 2023 ມີນັກທ່ອງທ່ຽວ ເຂົ້າມາທ່ຽວແຂວງບໍ່ແກ້ວ 278.158 ຄົນ ແລະ ຄາດຄະເນປີ 2024 ຈະດຶງດູດເອົານັກທ່ອງທ່ຽວໃຫ້ 345.705 ຄົນ.