ກອງປະຊຸມແນະນຳການທ່ອງທ່ຽວສຳລັບສື່ມວນຊົນ ຈັດໃນວັນທີ 23 ມັງກອນ 2024 ທີ່ສູນການຄ້າລາວໄອ-ເຕັກ ມີທ່ານ ນາງ ມະນີສາຄອນ ທຳມະວົງໄຊ ຮອງຫົວໜ້າກົມໂຄສະນາການທ່ອງທ່ຽວ ກະຊວງຖະແຫຼງຂ່າວ ວັດທະ ນະທຳ ແລະ ທ່ອງທ່ຽວ ແລະ ຜູ້ຕາງໜ້າຈາກປະເທດອາຊຽນເຂົ້າຮ່ວມ.

ໃນກອງປະຊຸມ ທ່ານ ນາງ ມະນີສາຄອນ ທຳມະວົງໄຊ ກ່າວວ່າ: ກອງປະຊຸມຄັ້ງນີ້ເປັນກອງປະຊຸມທີ່ຕິດພັນກັບສື່ມວນຊົນ ເຊິ່ງເປັນເວທີທີ່ໃຫ້ບັນດາປະເທດອາຊຽນມີໂອກາດໄດ້ໂຄສະນາ ແລະ ນຳສະເໜີແຫຼ່ງທ່ອງທ່ຽວທີ່ສຳຄັນຂອງແຕ່ລະປະເທດໃຫ້ບັນດາສື່ມວນຊົນຕ່າງປະ ເທດທີ່ເຂົ້າຮ່ວມງານຄັ້ງນີ້ຫຼາຍກວ່າ 26 ພາກສ່ວນທົ່ວ ໂລກທີ່ໃຫ້ຄວາມສົນໃຈ ເຊິ່ງ ສປປ ລາວ ກໍໄດ້ນຳສະເໜີການທ່ອງທ່ຽວ ໂດຍສະເພາະວ່າປີທ່ອງທ່ຽວ 2024 ເນື່ອງຈາກວ່າບາງປະເທດບໍ່ເຄີຍມາລາວ ໂດຍໄດ້ນຳສະ ເໜີວິທີການເຂົ້າມາທ່ອງທ່ຽວລາວເຊັ່ນ ການຄົມມະນາຄົມຂົນສົ່ງ ການສະເໜີວີຊ້າຕ່າງໆ ນອກນີ້ກໍໄດ້ນຳເໜີກິດຈະ ກຳຂອງປີທ່ອງທ່ຽວລາວທີ່ລັດຖະບານໄດ້ອະນຸມັດຈັດປີທ່ອງທ່ຽວລາວຢູ່ບັນດາແຂວງຕ່າງໆ ໂດຍໄດ້ເອົາຄິວອາໂຄດເພື່ອໃຫ້ບັນດາສື່ມວນຊົນປະເທດຕ່າງໆສະແກນເອົາຂໍ້ມູນເພື່ອນຳເອົາສະຖານທີ່ທ່ອງທ່ຽວຂອງ ສປປ ລາວໄປໂຄສະນາໃນສື່ຂອງປະເທດເຂົາເຈົ້າ.

ສຳລັບການທ່ອງທ່ຽວຢູ່ ສປປ ລາວ ສື່ມວນຊົນຕ່າງປະ ເທດມີຄວາມສົນໃຈຫຼາຍບັນຫາເປັນຕົ້ນ ການເດີນທາງດ້ວຍລົດໄຟ ເນື່ອງຈາກວ່າລົດໄຟເປັນພາຫະນະເປັນການເດີນທາງໃໝ່ຂອງ ສປປ ລາວ ນຳສະເໜີແຫຼ່ງທ່ອງທ່ຽວທີ່ຢູ່ໃກ້ຄຽງກັບສະຖະນີລົດໄຟ ໄລຍະທາງແຕ່ນະຄອນ ຫຼວງໄປຮອດວັງວຽງ ສະຖານທີ່ທ່ອງທ່ຽວຢູ່ຫຼວງພະບາງ ວັດວາອາຮາມກິດຈະກຳຕ່າງໆທີ່ຢູ່ຫຼວງພະບາງ ການເດີນ ທາງຈາກຫຼວງພະບາງໄປຫາອຸດົມໄຊ ການເດີນທາງຈາກທາງເຮືອທີ່ມາຈາກຊາຍແດນໄທ ພາຍຫຼັງສຳເລັດກອງປະຊຸມຄັ້ງນີ້ຈະໄດ້ຜົນປະໂຫຍດຫຼາຍຢ່າງຄາດວ່າຈະດຶງນັກທ່ອງທ່ຽວເຂົ້າມາທ່ຽວລາວຫຼາຍຂຶ້ນ.