ຈັດຂະບວນຍ່າງ ເພື່ອຂ່ຳນັບຊົມເຊີຍວັນສ້າງຕັ້ງພັກປະຊາຊົນ ປະຕິວັດລາວຄົບຮອບ 70 ປີ
17/03/2025
ອະນຸກຳມະການແຂ່ງຂັນ ແລະ ຍ້ອງຍໍ ຮ່ວມກັບ ນະຄອນຫຼວງວຽງຈັນ ຈັດຂະບວນຍ່າງ ເພື່ອຂ່ຳນັບຊົມເຊີຍວັນສ້າງຕັ້ງພັກປະຊາຊົນ ປະຕິວັດລາວຄົບຮອບ 70 ປີ ຂຶ້ນໃນວັນທີ 15 ມີນາ 2025 ທີ່ສວນປະຕູໄຊ ໂດຍມີ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ການນຳພັກ-ລັດ ແລະມວນຊົນເຂົ້າຮ່ວມ.
ໃນພິທີ ສະຫາຍ ອະນຸພາບ ຕຸນາລົມ ຄະນະເລຂາທິການສູນກາງພັກ ເລຂາອົງຄະນະພັກນະຄອນຫຼວງວຽງຈັນ ໄດ້ຂຶ້ນກ່າວເປີດງານ ໂດຍທ່ານໄດ້ຫວນຄືນໂດຍສັງເຂບຂອງການເຕີບໃຫຍ່ຂະຫຍາຍຕົວຂອງພັກປະຊາຊົນປະຕິວັດລາວ ພ້ອມຍັງກ່າວວ່າ ຂະບວນຍ່າງຄັ້ງນີ້ ແມ່ນ 1 ໃນບັນດາກິດຈະກຳໃນການສິເຫຼີມສະຫຼອງ 3 ວັນປະຫວັດສາດ ທີ່ຄະນະກຳມະການລະດັບຊາດ ໄດ້ກຳນົດໃຫ້ຈັດຂຶ້ນ ເພື່ອເປັນໂອກາດໃຫ້ພະນັກງານ ລັດຖະກອນ ມວນຊົນ ຊັ້ນຄົນຕ່າງໆ ກໍຄື ປວງຊົນຊາວນະຄອນຫຼວງວຽງຈັນ ໄດ້ມາຮ່ວມຂະບວນເພື່ອຄວາມສາມັກຄີເປັນປຶກແຜນ.
ສຳລັບກິດຈະກຳໃນຄັ້ງນີ້ ແມ່ນໄດ້ເລີ່ມຈາກສວນປະຕູໄຊ ໄປກັບໂຕທີ່ໜ້າຫ້ອງວ່າການສຳນັກງານປະທານປະເທດ (ຫໍຄໍາ) ກັບມາຫາປະຕູໄຊ ໂດຍມີມວນຊົນເຂົ້າຮ່ວມຫຼາຍພັນຄົນ.
