ຂໍ້ມູນຈາກໜັງສືພິມວຽງຈັນໃໝ່

 

ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20/1/1949-20/1/2024) ວັນທີ 29 ມັງກອນ 2024 ຄະນະນໍາແນວລາວສ້າງຊາດນະຄອນຫຼວງວຽງຈັນ (ນວ) ພ້ອມດ້ວຍອົງການພາຄີນໍາໂດຍທ່ານ ຖະໜອມ ທຳທອງ ປະທານແນວລາວສ້າງຊາດ ນວ ແລະ ຄະນະນໍາພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ (ຖວ) ນວ ນໍາໂດຍທ່ານ ນາງ ວິໄລວອນ ຈັນທະລາຕີ ຫົວໜ້າພະແນກ ຖວທ ນວ ໄດ້ໄປອວຍພອນຄະນະພັກຄະນະບັນຊາກອງບັນຊາການທະຫານ ນວ ຖືກຕ້ອນຮັບໂດຍທ່ານ ພັນເອກ ບຸນວານ ພົມມະວົງ ຫົວໜ້າການທະຫານກອງບັນຊາການທະຫານ ນວ ພ້ອມດ້ວຍຄະນະພັກຄະນະບັນຊາ.

ໂອກາດນີ້ທ່ານ ຖະໜອມ ທໍາທອງ ຕາງໜ້າໃຫ້ຄະນະນໍາສອງພາກສ່ວນໄດ້ກ່າວອວຍພອນມາຍັງຄະ ນະພັກຄະນະບັນຊາ ນາຍ ແລະ ພົນທະຫານທົ່ວກອງບັນຊາການ ນວ ໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ກ່ອນອື່ນທ່ານໄດ້ສະແດງຄວວາມຍ້ອງຍໍຊົມເຊີຍມາຍັງກອງທັບທີ່ຍາດມາດໄດ້ຜົນງານອັນພົ້ນເດັ່ນໃນຕະຫຼອດຜ່ານມາເຮັດໃຫ້ຖັນແຖວກອງທັບເຕີບໃຫຍ່ເຂັ້ມແຂງທາງດ້ານປະລິ ມານ ແລະ ຄຸນນະພາບເຮັດໜ້າທີ່ໃນການປົກປັກຮັກສາ ແລະ ສ້າງສາພັດທະນາປະເທດຊາດໄດ້ຮັບການພັດທະນາຢ່າງບໍ່ຢຸດຢັ້ງ ໃນໂອກາດວັນສຳຄັນນີ້ອວຍພອນໃຫ້ຄະນະພັກຄະນະບັນຊາ ນາຍ ແລະ ພົນທະ ຫານທົ່ວກອງບັນຊາການທະຫານ ນວ ຈົ່ງປະສົບຜົນສຳເລັດໃນໜ້າທີ່ວຽກງານສ້າງກົມກອງໃຫ້ເຕີບໃຫຍ່ເຂັ້ມແຂງຕະຫຼອດໄປ ແລະ ໃນໂອກາດເຂົ້າອວຍພອນຄັ້ງນີ້ສອງພາກສ່ວນຍັງໄດ້ນໍາເອົາວັດຖຸປັດໄຈເປັນເຄື່ອງອຸປະໂພກ-ບໍລິໂພກ ແລະ ເງິນຈຳນວນໜຶ່ງມອບໃຫ້ກອງບັນຊາການທະຫານ ນວ ໃນນັ້ນແນວລາວສ້າງຊາດ ນວ ພ້ອມດ້ວຍອົງການພາຄີ ລວມມູນຄ່າ 35 ລ້ານກີບ ແລະ ພະແນກ ຖວທ ນວ ລວມມູນຄ່າ 9,3 ລ້ານກີບ.

ຕອນທ້າຍທ່ານ ພັນເອກ ບຸນວານ ພົມມະວົງ ໄດ້ຕາງໜ້າໃຫ້ຄະນະພັກຄະນະພັນຊາ ນາຍ ແລະ ພົນທະຫານທົ່ວກອງບັນຊາການທະຫານ ນວ ກ່າວສະແດງຄວາມຂອບໃຈ ແລະ ຮູ້ບຸນຄຸນມາມາຍັງຄະນະນໍາສອງພາກສ່ວນທີ່ໄດ້ມາອວຍພອນພ້ອມທັງມອບດຖຸປັດໄຈ ແລະ ເງິນຈຳນວນໜຶ່ງໃຫ້ກອງບັນຊາການທະຫານ ນວ ໃນໂອກາດວັນສຳຄັນກອງທັບຄັ້ງນີ້ເປັນການໃຫ້ກຳລັງໃຈ ແລະ ໃຫ້ຄວາມສຳຄັນຕໍ່ກຳລັງປ້ອງກັນຊາດໃນການປະຕິບັດໜ້າທີ່ເປັນຮົ້ວຂອງຊາດ ກອງທັບກັບປະຊາຊົນຄືປາກັບນໍ້າບໍ່ຕັດແຍກອອກຈາກກັນໄດ້ ມີຫຍັງກໍຕ້ອງຊ່ວຍເຫຼືອເຊິ່ງກັນ ແລະ ກັນ ພ້ອມກັນມີຜົນສໍາເລັດເປັນກ້າວໆ.