ຂໍ້ມູນຈາກໜັງສືພິມວຽງຈັນໃໝ່

 

ວັນທີ 23 ມັງກອນ 2024 ຜ່ານມາ ທີ່ພະແນກສາທາລະນະສຸກ ນະຄອນຫຼວງວຽງຈັນ ໄດ້ຈັດກອງປະຊຸມປຶກສາຫາລື ລະຫວ່າງ ພະແນກການຕ່າງໆ ອ້ອມຂ້າງນະຄອນຫຼວງວຽງຈັນ ໃນການເພີ່ມທະວີການຈັດຕັ້ງປະຕິບັດກົດໝາຍຫ້າມຢາສູບໄຟຟ້າ ພາຍໃນນະຄອນຫຼວງວຽງຈັນ ໂດຍເປັນປະທານຂອງທ່ານ ດຣ ນາງ ໄຊພອນ ນັນທະພອນ ຫົວໜ້າພະແນກສາທາລະນະສຸກ ນວ ມີທ່ານ ດຣ ຄັດທະນະພອນ ພັນດວງສີ ຮອງກົມອະນາໄມ ແລະ ສົ່ງເສີມສຸຂະພາບ ກະຊວງສາທລະນະສຸກ ພ້ອມດ້ວຍບັນດາຜູ້ຕາງ ໜ້າຈາກພະແນກການ ກົມອານາໄມ ກົມຄວບຄຸມ ແລະ ພາກສ່ວນກ່ຽວຂ້ອງເຂົ້າຮ່ວມ.

ຈຸດປະສົງກອງປະຊຸມຄັ້ງນີ້ ເພື່ອປຶກສາຫາລື ແລະ ແລກປ່ຽນບົດຮຽນຂອງພະແນກການຕ່າງໆ ອ້ອມຂ້າງນະຄອນຫຼວງວຽງຈັນ ໃນການຈັດຕັ້ງປະຕິບັດກົດໝາຍ ແລະ ນິຕິກໍາທີ່ກ່ຽວຂ້ອງ ໃຫ້ມີປະສິດທິພາບ ແລະ ປະສິດທິຜົນ ກ່ຽວກັບການຫ້າມຢາສູບໄຟຟ້າ ລວມທັງການຜະລິດ ນໍາເຂົ້າ ສົ່ງອອກ ສົ່ງຜ່ານ ຊື້-ຂາຍ ຄອບຄອງ ແລະ ຊົມໃຊ້ ສຳລັບ ກົດໝາຍວ່າດ້ວຍການຄວບຄຸມຢາສູບ (ສະບັບປັບປຸງ) ປະກອບມີ10 ພາກ 63 ມາດຕາ ໂດຍໄດ້ກຳນົດຫຼັກການ ລະບຽບການ ແລະ ມາດຕະການ ກ່ຽວກັບການຄຸ້ມຄອງ ຕິດຕາມ ກວດກາວຽກຄວບຄຸມຢາສູບ ເພື່ອເຮັດໃຫ້ການຈັດຕັ້ງປະຕິບັດວຽກງານດັ່ງກ່າວ ມີປະສິດທິພາບ ແລະ ປະສິດທິຜົນ ແນ່ໃສ່ຫຼຸດຜ່ອນການຊົມໃຊ້ຢາສູບ ຄ່າໃຊ້ຈ່າຍທີ່ບໍ່ຈຳເປັນ ປົກປ້ອງ ສົ່ງເສີມໃຫ້ພົນລະ ເມືອງມີສຸຂະພາບດີ ແລະ ປົກປັກຮັກສາສິ່ງແວດລ້ອມ ສາມາດເຊື່ອມໂຍງກັບພາກພື້ນ ແລະ ສາກົນ ປະ ກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ.