ຂໍ້ມູນຈາກໜັງສືພິມວຽງຈັນໃໝ່

 

ສະມາຄົມນັກທຸລະກິດຮ້ານອາຫານລາວ ນະຄອນຫຼວງວຽງຈັນ (ນວ) ຮ່ວມກັບ ຝ່າຍການຂາຍ ແລະ ການຕະຫຼາດ ບໍລິສັດ ເບຍລາວ ຈຳກັດ ໄດ້ຈັດການແຂ່ງຂັນກີລາ ປະຈຳປີ 2024 (ກິດຈະກໍາບານເຕະ 4 ພາກສ່ວນ) ຂຶ້ນໃນວັນທີ 23 ມັງກອນ 2024 ທີ່ເດີ່ນກິລາຫຍ້າທຽມ ສາທິດ ເພື່ອສ້າງຂະບວນການສະເຫຼີມສະຫຼອງວັນສຳຄັນຕ່າງໆຂອງພັກ-ຂອງຊາດ ໂດຍສະເພາະແມ່ນຊົມເຊີຍວັນສ້າງຕັ້ງກອງທັບປະ ຊາຊົນ ປະຕິວັດລາວ ຄົບຮອບ 75 ປີ ແລະ ປີທ່ອງທ່ຽວລາວ 2024 ໃຫ້ເປັນຂະບວນການຟົດຟື້ນ.

ໂອກາດນີ້ ທ່ານ ຄຳແພງ ເພົ້າບົວວົງ ປະທານສະມາຄົມນັກທຸລະກິດຮ້ານອາຫານລາວ ກ່າວວ່າ: ການຈັດກິດຈະກໍາບານເຕະ 4 ພາກສ່ວນ ຄັ້ງນີ້ ຄອບຄົວຄູ່ຮ່ວມທຸລະກິດບໍລິສັດ ເບຍລາວ ຈໍາກັດ ໃນ ນວ ຈັດຂຶ້ນມາ 5 ຄັ້ງແລ້ວ ເຊິ່ງໃນແຕ່ລະຄັ້ງ ແມ່ນຈະຈັດແຂ່ງຂັນຫຼາຍກິດຈະກໍາຫຼາຍປະເພດກີລາ ແລະ ຕິດພັນກັບການປຸກລະດົມຂົນຂວາຍທັງວັດຖຸ ແລະ ປັດໄຈ ເພື່ອນຳໄປສົ່ງເສີມ ແລະ ຊ່ວຍເຫຼືອບັນດາພາກ ສ່ວນທີ່ຂາດເຂີນຫ່າງໄກສອກຫຼີກ ໂດຍສະເພາະໃນໄລຍະຜ່ານມາ ພວກເຮົາກໍຍັງໄດ້ຮ່ວມໃຈກັນຊ່ວຍ ເຫຼືອສັງຄົມ ກໍຄື ບັນດາທ້ອງຖິ່ນ ຈາກຫຼາຍແຂວງໃນຂອບເຂດທົ່ວປະເທດ.

ຢ່າງໃດກໍຕາມ ປີນີ້ ພວກເຮົາໄດ້ກຳນົດເອົາ 4 ພາກສ່ວນເຂົ້າຮ່ວມ ປະກອບມີ ທີມສະມາຄົມນັກທຸລະ ກິດຮ້ານອາຫານລາວ ນວ ທີມຝ່າຍການຂາຍ ແລະ ການຕະຫຼາດ ບໍລິສັດ ເບຍລາວ ທີມພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວ (ຖວທ) ນວ ແລະ ທີມສື່ມວນຊົນສາຍກີລາລາວ ອ້ອມຂ້າງສູນກາງ ການແຂ່ງຂັນແມ່ນໄດ້ມີການຈັບສະຫຼາກປະກົບຄູ່ແຂ່ງຂັນ ໃນຮອບທຳອິດ ທີມຝ່າຍການຂາຍ ແລະ ການຕະຫຼາດ ສາມາດເອົາຊະນະ ທີມສື່ມວນຊົນສາຍກີລາລາວ ໄປແບບຫວຸດຫວິດ 3-2 ປະຕູ ສ່ວນອີກຄູ່ໜຶ່ງ ທີມສະມາຄົມນັກທຸລະກິດຮ້ານອາຫານລາວ ເອົາຊະນະ ທີມພະແນກ ຖວທ ນວ 9-5 ປະຕູ ໂຄຈອນໄປຊີງຊະນະເລີດ ພົບກັບ ທີມຝ່າຍການຂາຍ ແລະ ການຕະຫຼາດ ກ່ອນຈະເປັນທີມຝ່າຍການຂາຍ ແລະ ການຕະຫຼາດ ໄລ່ເອົາຊະນະໄປແບບສຸດມ່ວນ 6-4 ປະຕູ ໄດ້ແຊັມໄປຄອງ ສ່ວນຄູ່ຊີງທີ 3 ທີມສື່ມວນຊົນສາຍກີລາລາວ ສາມາດເອົາຊະນະ ທີມ ພະແນກ ຖວທ ນວ 8-6 ປະຕູ.

ໃຫ້ກຽດເຂົ້າຮ່ວມ ແລະ ມອບຂັນລາງວັນມີ ທ່ານ ພອນ ບາດແມນ ຜູ້ອໍານວຍການຝ່າຍຂາຍ ບໍລິສັດ ເບຍລາວ ຈໍາກັດ ທ່ານ ຈັນສະໝອນ ຜ່ອງຈັນທາ ຜູ້ອຳນວຍການ ຝ່າຍການຕະຫຼາດ ບໍລິສັດ ເບຍລາວ ທ່ານ ແກ້ວວິໄລສັກ ແສນສັກດາ ຮອງຫົວໜ້າພະແນກ ທັງເປັນຜູ້ຊີນຳ 3 ອົງການຈັດຕັ້ງມະຫາຊົນ ພະແນກ ຖວທ ນວ ແລະ ທ່ານ ສຸກສາຄອນ ສີປະເສີດ ຫົວໜ້າບັນນາທິການໜັງສືພີມສຶກສາ ວິທະຍາສາດ ແລະ ກີລາ ຜູ້ອໍານວຍການສູນໂຄສະນາຂ່າວສານການສຶກສາ ແລະ ກີລາ ກະຊວງສຶກສາທິການ ແລະ ກີລາ ພ້ອມດ້ວຍຄະນະບໍລິຫານງານສະມາຄົມນັກທຸລະກິດຮ້ານອາຫານລາວ ແລະ ບັນດາສະມາຊິກຈາກພາກສ່ວນຕ່າງໆຢ່າງພ້ອມພຽງ.